Exo 13 | NdeIBE | STEP | UJehova wathi kuMosi,

Exodus 13

Amazibulo ahlukaniselwa uJehova

1 UJehova wathi kuMosi, 2 “Yahlukanisela kimi wonke amazibulo esilisa. Konke okuzalwa kuqala okuvula isizalo phakathi kwama-Israyeli kungokwami, loba ngumuntu longabe yisifuyo.”

3 Ngakho uMosi wasesithi ebantwini, “Lugcineni lube lusuku lwesikhumbuzo lolu, ilanga elaphuma ngalo eGibhithe, liphuma elizweni lobugqili, ngokuba uJehova walikhupha khona ngamandla amakhulu. Lingadli lutho olulemvubelo. 4 Lamuhla ngenyanga ka-Abhibhi, liyasuka. 5 Kuzakuthi uJehova angalifikisa elizweni lamaKhenani, lamaHithi, lama-Amori, lamaHivi lamaJebhusi – ilizwe afunga kubokhokho benu ukuthi uzalinika lona, ilizwe eligeleza uchago lezinyosi – kufanele liwugcine umkhosi lo kuyona le inyanga. 6 Okwezizinsuku eziyisikhombisa lidle isinkwa esingelamvubelo kuthi ngosuku lwesikhombisa lenze umkhosi kaJehova;

7 kungabonwa lutho olulemvubelo phakathi kwenu, kuvele kungabonwa mvubelo elizweni lenu lonke. 8 Ngalelolanga ngulowo katshele indodana yakhe athi, ‘Lokhu ngikwenza ngenxa yalokho uJehova angenzela khona ekuphumeni kwami eGibhithe.’ 9 Lesisikhumbuzo kuwe sizakuba luphawu esandleni sakho lesikhumbuzo ebunzini lakho ukuthi umlayo kaJehova ube sezindebeni zakho. Ngokuba uJehova wakukhupha eGibhithe ngesandla sakhe esilamandla amakhulu. 10 Kalibosigcina lesisimiso ngesikhathi esimisiweyo minyaka yonke.

11 “Nxa uJehova eselingenisile elizweni lamaKhenani walinika lona njengokuthembisa kwakhe kini lakubokhokho benu, 12 kumele lahlukanisele uJehova konke okuzalwa kuqala yizo zonke izizalo. Wonke amazibulo esilisa ezifuyo zenu ngakaJehova. 13 Lizahlenga izibulo likababhemi ngezinyane, kodwa uma lingalihlenganga laphuleni intamo. Lihlenge njalo wonke amadodana enu angamazibulo.

14 “Nxa indodana yakho ikubuza ngesikhathi esizayo isithi, ‘Kutshoni lokhu?’ ubokuthi kuyo, ‘UJehova wasikhupha eGibhithe ngesandla sakhe esilamandla amakhulu, wasikhupha elizweni lobugqili. 15 Kwathi uFaro eqholoza esala ukusiyekela sihambe uJehova wabulala wonke amazibulo eGibhithe, awabantu lawezinyamazana. Yikho nje nginikela kuJehova izibulo lesilisa elezizalo zonke ngiphinde ngihlenge wonke amadodana ami angamazibulo.’ 16 Lokhu kuzakuba njengophawu esandleni sakho lesibonelo ebunzini lakho ukuthi uJehova wakukhupha eGibhithe ngesandla sakhe esilamandla amakhulu.”

Bachapha uLwandle Olubomvu

17 UFaro esebavumele abantu ukuthi bahambe, uNkulunkulu kabakhokhelanga ngendlela edabula elizweni lamaFilisti loba yona yayiquma. Yingoba uNkulunkulu wathi, “Nxa behlangana lempi mhlawumbe bangethuka babuyele eGibhithe.”

18 Yikho uNkulunkulu wababhodisa abantu wabahola ngendlela yenkangala eya eLwandle Olubomvu. Abako-Israyeli baphuma eGibhithe behlomele impi. 19 UMosi wawathwala amathambo kaJosefa ngoba uJosefa wayenze isifungo lamadodana ka-Israyeli wathi, “Ngempela uNkulunkulu uzalikhulula. Lapho-ke libowathwala amathambo ami lisuke lawo kule indawo. 20 Sebesukile eSukhothi bayamisa e-Ethami indawo egudlene lenkangala. 21 Emini uJehova wahamba phambi kwabo ngensika yeyezi ebahola endleleni yabo, kwathi ebusuku wabahola ngensika yomlilo ukubakhanyisela ukuze bahambe emini lebusuku. 22 Insika yeyezi emini loba insika yomlilo ebusuku kakuzange kusuke endaweni yakho phambi kwabantu.